Glitrandi föstudagur

Glitrandi föstudagur

Í dag, föstudaginn 27. febrúar, var dagur sjaldgæfra sjúkdóma og heilkenna. Í tilefni dagsins klæddust nemendur og starfsfólk Eskifjarðarskóla einhverju glitrandi eða mættu í sínu fínasta pússi - glimmer, pallíettur eða hvað sem skín. Allt sem er litríkt og glitrar minnir okkur á að við erum öll ólík, einstök og dýrmæt.

Félag Einstakra barna hvetur landsmenn til að sýna stuðning, samstöðu og hlýju í verki með því að GLITRA með þeim. Með þátttöku í þessari vitundarvakningu vöktum við athygli á því að um 900 börn og ungmenni á Íslandi lifa með sjaldgæfa sjúkdóma og heilkenni - greiningar sem fáir þekkja eða skilja, en samkennd skiptir öllu máli. Við glitruðum saman og sköpuðum sýnileika. Nemendur á yngsta stigi fengu að koma með sparinesti og nutu þess að gera sér dagamun.

Undanfarnar vikur hafa einnig verið skemmtilegar hefðir í gangi hjá okkur. Á bóndadegi færðu stúlkurnar drengjunum gjöf sem þær höfðu bakað og föndrað. Í dag héldum við áfram þessari hefð í tilefni konudagsins og strákarnir gáfu stelpunum góðgæti og buðu í notalega stund í salnum.