Ömmu og afa dagur í 4. bekk

Í janúar hefur verið sérstök áhersla á Pólland í 4. bekk. Nemendur kynntu sér landið með fjölbreyttum hætti: þeir bjuggu til veggspjöld um helstu borgir Póllands, lærðu nokkur orð á pólsku og fengu jafnframt tækifæri til að smakka hefðbundinn pólskan mat.

Í pólskri menningu er sérstakur dagur helgaður ömmum og öfum í janúar. Dagur ömmu (Dzień Babci) er haldinn 21. janúar og dagur afa (Dzień Dziadka) 22. janúar. Í Póllandi er algengt að börn og fullorðnir heimsæki afa og ömmur sínar á þessum dögum og færi þeim kort, blóm og litlar gjafir. Í skólum og leikskólum eru oft haldnir viðburðir og sýningar í tilefni dagsins.

Af þessu tilefni buðu nemendur í 4. bekk ömmum og öfum í heimsókn í skólann í gær 22. janúar.   Alicja kennari bekkjarins stýrði sínum nemendum í verkefninu,  Heimsóknin tókst afar vel. Nemendur voru með góðan upplestur, falleg skilaboð og gáfu sínu fólki gjafir.