Út fyrir kassann
Út fyrir kassann er sjálfstætt starfandi fyrirtæki sem sérhæfir sig í sjálfstyrkingarnámskeiðum fyrir stráka, stelpur og ungt fólk. Þau Bjarni Fritzson og Kristín Tómasdóttir eru eigendur fyrirtækisins, hafa hannað námskeiðin og halda þau. Vinna þeirra er byggð á bókum þeirra og áralangri reynslu af vinnu með börnum og ungu fólki.
Bjarni og Kristín komu austur snemma morguns og hófu vinnuna með nemendur í 5.-7. bekk. Nemendum var skipt í hópa eftir kynjum og vann Bjarni með strákana og Kristín með stelpurnar. Meðal viðfangsefna voru sjálfstraust og sjálfsmynd og hvernig krakkarnir geta komið í veg fyrir að sjálfsmynd þeirra þróist á neikvæðan hátt. Námskeiðið fyrir þennan hóp stóð yfir fram að hádegi og eftir hádegið voru unglingarnir í 8.-10. bekk. Þeim var einnig kynjaskipt og fjallað var um sjálfsmyndina á sem víðastan hátt.
Mikil ánægja var með námskeiðið hjá nemendum og eru foreldrafélaginu og Alcoa sýndar miklar þakkir fyrir að standa fyrir því.