Fréttir

Þorrablót 1. - 5. bekkjar var haldið föstudaginn 31. janúar og gekk mjög vel. Nemendur mættu í sínu fínasta pússi og borðuðu saman þorramatinn með bestu lyst. Hver bekkur kom síðan með atriði frá sér og vel var tekið undir í fjöldasöngnum.

Annarlok miðannar verða miðvikudaginn 12. febrúar. Þá gefst foreldrum tækifæri að hitta umsjónarkennara og ræða stöðu barna þeirra í náminu og öðrum þeim þáttum er að skólastarfi snúa. * Viðtalstímar. Þriðjudaginn 4. febrúar opnum við fyrir að foreldrar geti skráð hentugan viðtalstíma á Mentor fyrir annarlokin. Við lokum aftur fyrir þá skráningu í lok föstudagsins 7. feb.

Í lok dags, föstudaginn 20. desember, hefst jólafrí nemenda og starfsfólks. Við óskum öllum gleðilegra jóla og farsældar á nýju ári. Við hefjum kennslu aftur mánudaginn 6. janúar samkvæmt stundatöflu.

Í tilefni af 100 ára afmæli Alþjóðasambands stjarnfræðinga fór fram nafnagift á stjörnum og fylgitunglum í ljósárafjarlægð frá jörðu. Það kom í hlut Íslendinga að gefa einni stjörnu og fylgitungli þess nafn og bárust Stjarnvísindafélagi Íslands á þriðja hundrað tillögur að nöfnum. Netkosning fór síðan fram og skemmtilegt er frá því að segja að tillaga Guðmanns Þorvaldssonar kennara við Eskifjarðarskóla um nöfn hlaut náð fyrir augum kjósenda. Tillaga Guðmans var þessi: Funi og Fold: Stutt og falleg íslensk orð sem eru auðveld í framburði tungumála. Funi merkir eldur og Fold merkir jörð sem vísar til stjörnu og reikistjörnu.

Hið árlega Desball nemenda 6. - 10. bekkjar verður haldið föstudaginn 13. desember. Þetta er mikið stuðball sem nemendaráð stendur fyrir.

Veðurstofa Íslands gerir ráð fyrir versnandi veðri á Austurlandi í nótt og í fyrramálið. Gert er ráð fyrir miklum vindi og talsverðri ofankomu. Fólk er beðið að athuga að talverðar líkur er á því að skólahald leik-, grunn-, og tónskóla geti raskast vegna þessa. Munu tilkynningar verða sendar út á heimasíðu Fjarðabyggðar og Facebook síðu fyrir klukkan 6:30 í fyrramálið. Vinsamlega skoðið tilkynningu á heimasíðu Fjarðarbyggðar í fyrramálið eins munum við skólastjórnendur senda póst til ykkar og tilkynningu á heimasíðu skólans strax ákvörðun liggur fyrir.

Nemendur hafa lesið af miklum krafti síðastliðnar þrjár vikur. Lestrarmiðum á vegg á miðsvæði hefur fjölgað mjög mikið og þarf orðið verulega töluglöggan mann að finna út fjölda lesinna bóka.

Bubbi Morthens fékk á dögunum afhenta upptöku af tónleikum hans á jólabingói á unglingastigi í Grunnskóla Eskifjarðar frá árinu 1983. Hann ræddi við nemendur og kennara á milli laga um einelti og samkynhneigð og verður að segjast að þessi 36 ára gömlu ummæli hans eigi erindi í dag: „Okkur þykir ekki gott þegar við verðum fyrir sársauka á sálinni og manni getur liðið illa. Hommarnir hafa hjarta og sál og verða ástfangnir eins og við hin. Ekki okkar mannanna að dæma,“ sagði Bubbi í Eskifjarðarskóla árið 1983 áður en hann tók lagið Strákarnir á Borginni. Myndatexti: Dagný Jónsdóttir, fyrrum nemandi við Grunnskóla Eskifjarðar, afhenti Bubba upptökuna.

Við héldum Dag íslenskrar tungu hátíðlegan með dagskrá í salnum okkar. Nemendur 7. bekkjar fluttu nokkur ljóð eftir Þórarinn Eldjárn en ljóð hans vekja ávallt gleði og eftirtekt nemenda. Þrír nemendur 9. bekkjar lásu einnig ævintýri eftir Jónas Hallgrímsson um Stúlkuna í turninum. Þennan dag hófum við einnig lestarátak sem stendur í þrjár vikur.